Praia da Ermida e illa da Estrela
A Ermida: praia para o ocio e para a vida
Unha pasarela de madeira conduce directamente á area branca e fina da praia da Ermida, ás súas ondas moderadas e ao sentir o vento do que tamén é posible buscar acubillo baixo o piñeiral da entrada. No verán dispón de todos os servizos e WC adaptados.
Desde este punto vese unha bonita panorámica da illa da Estrela á que se conta, o areal estivo unido por un brazo de area do que só queda a actual praia.
A ruta Camiño da Ribeira chega aquí desde Gondomil (Pedra da Serpe) e continua 1 km pola beiramar entre unha densa paisaxe forestal ata a do Osmo. ¡Parecerache incríble estar andando tan preto do mar!
O complexo dunar na praia da Ermida tamén está incluído nas proteccións LIC (Lugar de Interese Comunitario) Costa da Morte e ZEPA (Zona de Especial Protección para as Aves). Un dos valores ecolóxicos deste lugar que se debe respectar é a braña formada polo rego de Guxín. Por eso, evita desplazarte ata a praia por fóra da rampla de madeira.
E adentrándonos na historia e nas crenzas populares, o antropólogo cormelán Manuel Cousillas Rodríguez advírtenos no seu libro "Literatura popular en la Costa de la Muerte" (1998) que se pola noite pasas pola encrucillada que descende dende a praia da Ermida ata o río Cuíñas e as lavandeiras che piden que lles axudes a torcer a roupa, non o fagas!
Podes mudar melgacho e esvarar polo río cara ao mar!
A illa da Estrela
No fondo do val de Gondomil, fronte á praia da Ermida, atópase a illa da Estrela cun pasado que se adentra na Prehistoria.
Nela hai un castro e os restos dunha capela dedicada á Virxe da Estrela. O Luns de Pascua ten lugar unha romaría na igrexa de Santo Hadrián de Corme. Se coincide con mareas vivas, é posible pasar a pé a illa. Na illa atópanse tamén antigas sepulturas de mariñeiros descoñecidos que traia o mar. Os baixos, segundo comentan os submarinistas, son dunha gran fermosura.
