Entrada do malecón: antigo porto comercial
Xunto ao actual paseo fluvial do río Anllóns e coincidindo cos últimos cinco quilómetros navegables da canle, comezamos a recordar parte da historia mariñeira destas augas.
A carón do río Anllóns naceu Eduardo Pondal, o gran poeta galego do Rexurdimento, coñecido por ser o autor da letra do himno de Galicia. O seu irmán, Cesáreo Pondal, foi un home clave no desenvolvemento do territorio. Aquí, ao lado da casa familiar habilitou un porto ata onde chegaban os barcos veleiros que remontaban a desembocadura do Anllóns e a entrada da ría de Corme e Laxe como recorda Jaime Valdés Parga, herdeiro da familia e autor do libro "Ponteceso, el nacimiento de un pueblo". Podes ver o vídeo a continuación.
Ata mediados do pasado século, Ponteceso era porto de chegada de pequenos barcos de cabotaxe que traían mercadorías e que partían deste punto da terra cargados de cereais, madeiras ou minerais, entre outros.
Na posguerra, os madereiros portugueses introduciron a explotación do piñeiro na zona. Os bosques de Bergantiños daban abundante materia prima que se distribuía a toda España desde o porto de Corme. Estes castelos de táboas constitúen unha lembranza da época dourada, cando nesta vila de Ponteceso había dezanove serradoiros a vapor e dous eléctricos.
A entrada do malecón (dique de terra e pedra) tamén era punto de encontro para as gabarras, embarcacións de madeira a motor. Sobre elas sacábase area do leito do río para despois secala nos depósitos situados nas marxes da ribeira. Aínda hoxe se poden ver os restos dalgún, así como as vellas bitas de ferro nas que se amarraban as barcas.
Ata hai poucos anos, durante a tempada de inverno e coincidindo coa enchedura da marea, neste tramo era frecuente ver aos anguleiros afeccionados que collían angulas nas noites máis frías do inverno ou solla con métodos tradicionais como a estacada e a fisga. O teu camiño polo malecón estará franqueado tamargueiras, uns arbustos que resisten moi ben os duras condicións climatolóxicas.
